BEGAWE SERABUTAN - PART TIME

Oi capek nian rasonyo toboh aku nich, kalo dipeker-peker payah nian nyari gawe di Canberra. Dak teraso dah satu bulan aku di Canberra. Tapi mak ini masih jugo belum dapet gawean yang mantep. Tolong doake bae ye aku cepat dapet gawean di sini.

Sebenarnyo ado jugo gawean minggu kemaren dan gawenyo kayak gawe kuli angkut barang. Tapi cuma 4 hari bae, kerjonyo kalo nak dikatoke dakkatek berhentinyo, rasonyo dak biso dikatoke. Lemas, capek dan loyo itulah yang biso aku katoke nak melok gawean mak itu.

Gawe kami bantu uwong yang nak ngadoke pameran karpet di Albert Hall, jadi melok lah aku daftar di sano. yo hetong-hetong cari duet buat beli makan dan susu anak. nak ngarepke beasiswa bini aku rasonyo dak cokop. Jadi yo kerjo jadi kuli angkut barang. Tapi dak apolah yang penteng dapet doet buat keluargo.

Ngapo nak malu, banyak jugo mahasiswa yang begawe di sano macam mak aku nich. Tapi aku nich dah tuo , untong bae banyak yang ngerti posisi aku nich jadi budak-budak laen dak berhetong gawean samo aku. Memang hari pertamo gawenyo saro nian, ngeluarke karpet dari container. diunjal-unjal masok ke dalem gedung. Singgonyo dak katek berhentinyo. Rasono nafas ini lemas nian. Aku raso kunang-kunang di mato ini, maklom bae hari pertama begawe di sano aku jugo paginyo bangun jam 3 subuh, rencanonyo aku nak jadi tukang antar koran ke rumah-rumah. Jadinyo fisik aku lemah. Tapi aku mondor dari tukang antar koran, walau cuma satu hari. Soalnyo aku dak enak , takotnyo gek aku dak biso jago komitment buat betahan lamo di sano. Aku punyo rencano laen kalo biso dapat gawe yang lemak dan sesuai dengan pengalaman begawe aku.

Jadi selamo 4 hari aku goyori gawean mak itu, ado raso capek dan raso jengkel kalo keno marah samo bos..misalnyo kalo salah narohke karpet tapi kalau ingat anak-anak dan bini raso itu hilang. Dan aku juga anggap gawe mak itu sebagai tempat aku bentok badan aku supayo bagus, setidak-tidaknyo yo ngurangi lemak di toboh aku nich..mak uji uwong tu fitness. Jadi aku anggap selamo 4 hari aku begawe di sano, aku pergi ke Gym atau tempat fitness dan digaji. Biar dak punyo raso apo-apo dan hilang raso capek itu.

Ado jugo kawan ngomong kalo uwong yang baru datang di Canberra dan nak begawe, kawah candradimukanyo yo begawe angkat-angkat karpet. Dan Akhinyo aku lolos jugo keluar dari sano. Dan dapat doet yo lumayanlah biso tambahan buat hedup selama 2 minggu.

Tapi gawean mak itu sekarang dah habes ..jadi aku nak begoyor cari gawean laen. Sudah banyak company yang kumasukke tapi belom jugo ado yang manggel. Saber bae lah men..

Namun aku jugo buat kelas online training piping di internet..yo begoyor baelah..disampeng cari tambahan buat bini dan anak-anak jugo aku punyo tanggong jawab terhadap 3 orang anak yatim di Bandung. Aku kadang bingung jugo dengan situasi aku ini. pengennyo aku tetap mengeremke duet untuk anak-anak yatim di Bandung tapi kondisi aku masih belom dapet gawe yang mantep. Tapi Insya Allah, Allah akan memberikan jalan buat aku untuk ngatase masalah aku nich.

DAK KATEK YANG MURAH DI CANBERRA

Aida...Pening Nian pala aku ini , kalo nak belanjo di Canberra, kadang pengen niat nak beli barang tapi kalo dijingok ternyato mahal nian. Jadi bingung nak makan makanan enak di sano..Dak pacak nian nak cari makan yang enak tapi murah...

Cubo pikirke bae..tau berapo harga 1 botol air putih ukuran 600 ml. bukannyo 4000 cak di Indonesia tapi tahu dak kalo di Canberra biso keno 2 - 3 dollar. Jadi pening nian mekerin yang kayak itu. Aku pernah jugo beli satu botol minuman air putih dengan ukuran 1, 5 Liter. dan kujingok hargonyo murah nian dibawah 2 dollar. Jadi kubeli bae dan ruponyo aku salah beli yang kubeli air soda..pantes bae hargonyo murah nian. Akhirnyo dak pacak nak diminum kareno kalo diminum mak itu bae mano lah lemak..kalo nak minum air soda yo pake susu lah..Aiiii Cugak Nian Aku nich peker aku dalam hati.

Istirku pernah kasih tahu aku kalo nak beli apo-apo bae janganlah di kurs kan dengan Rupiah, yo biso sakit kepala dan dak katek yang nak dibeli..Jadi Ikhlas ke bae kalo nak beli apo-apo di sini. Tapi uji aku , makmanu nak ikhlas kalo uji kito barang itu mahal. Tapi cak ini sudah kucubo lah menyesuaike pemahaman Rupiah ke Dollar Australia. Yo intinyo kalo nak beli apo-apo jangan berpikirkan nian.untuk rugi nyo.

Kalo disini ado jugo yang jual supermi atau Indomie tapi itulah hargo sebungkosnyo sekitar 6000 rupiah. Kalau di Kuala Lumpur sekitar 3500 rupiah. Tapi itulah janganlah dikurskan ke Rupiah. Pasti galonyo Mahal..

Kalo nak beli roti hargonyo sekitar 15000 rupiah tapi itulah kalo yang murah di Canberra, yang pernah kujingok yaitu Es Creem dan Susu. Makonya aku nak gari yang murah tapi Banyak..

Kalo nak nyari Beras disini pun banyak dan ado yang setara dengan harga di Indonesia. Soalnyo Aku pernah beli beras 10 kg nyo hargonyo 10 dollar, berasnyo lumayan dak jelek kali lah, tapi setidak-tidaknyo hamper samo lah dengan beras yang biaso aku makan yaitu besar PTN Kisaran. Hargonyo nampaknyo lebih mahal beras PTN daripado beras yang kubeli itu. Tapi sebenarnyo hargo beras itu 20 Dollar tapi karena discount 50% makonyo kamek beli..

Jadi kalo nak tinggal lamo di Canberra atau di Australia, usahokelah kerjo, kerjo apo baelah yang penting ado doet masuk. Lumayan Cak nyo kalau gawe-gawe yang dak pake skill semacam ngangkat-angkat, bersih-bersih dan laen-laen.Yo lumayan lah gajinyo setidak-tidaknyo biso ngedupin anak bini.

Dak katek raso nak gengsi-gengsian kalo di sini karena semuanyo samo, Kalo nak malu kerjo apo bae yo kelaperan jadi kalo nak laper yo tahankelah raso gengsi awak tu..Sebenarnyo dak mahal nian kalo hedup disini ni tapi itulah harus ado gawean dulu dan ado uang masuk baru lah kito meraso nyaman di sini.

Hedup disini yo digoyori bae sampe dimano yang penting kalo aku sih biso dekat sama anak dan bini, pengen jugo cari gaji yang besak gawe di Australia tapi bukan di Canberra. Kalo galak biso bae dapat gaji 200 ribu per tahun, tapi itulah jauh dari Keluarga. Yang ado gaji semak itu yoo di Perth dan Brisben, pokoknyo di luar Canberra, kalo di Canberra yo begawe-begawe yang non Skill.

SALAM PEMBUKA BUDAK PALEMBANG

Salam Pembuko bukan berarti nak buko puaso..Kalo nak puaso Ramadhan masih sebulan lagi cak nyo tuh. Aku nak noles tentang raso dingin aku di Canberra. Raso dingin nyo pecak raso dingin di dalam kulkas. Nak pake pemanas tapi di sini dak pacak bakar-bakar kayo api kagek keno tegor pulo samo pemerintah di sini.

Pening pala' aku ini merasoke raso dingin ini, tapi dak apo-apolah aku nak goyori baelah sampe dimano. Oh yo.amper lupo..sekarang ni lagi mosem winter alias mosim dingin, kalo di Palembang kalo mosim berhubungan dengan buah-buahan. Pecak mosim rambutan, mosem duren, mosim duku jarang kito dengar mosim winter, spring, summer, atau autumn.

Salam dari aku budak Palembang yang kesasar ke Canberra, aku disini melok bini aku yang kuliah di sini. Rencanonyo tinggal 4 tahun disini berdasarkan visa bini aku. Yo aku goyori baelah, pelok i baelah. Tapi  itulah aku sekarang belum begawe lagi nak cari lokak gawean disini.

Aku nak nyari gawean yang pas dengan gawean aku dulu tapi sampe mak ini masih begoyor bae. Memang uji uwong kalau di Australia banyak gawean, tapi itulah yang sesuai dengan pengalaman gaweku, aku musti melamar gawe di sydney, perth atau laennyo yang ado hubungannyo dengan Oil & Gas. Mak ini - mak ini, aku nich punyo pengalaman 10 tahun lebeh di Oil & Gas.

Tapi aku tinggal di Canberra jadi peluang nak begawe di Oil & Gas dak lah biso dapet. Aku pun dah capek begawe jauh dari keluargo. Jadi pengennyo aku nich nak begawe dekat keluargo aku tapi dapat gaji besak. Tapi aku masih melamar-melamar gawe , yo jingok di Internet. misalnyo di seek.com, allcarrier.com dan banyak singgohnyo. Yang penting dapat gawelah.

Tapi kalo nak cepat dapat gawe yo kerjo yang dak pake experiences misalnyo jadi tukang bersih-bersih alias jadi cleaner, tukaang antar koran, begawe kasar misalnyo jadi kuli angkat. Tapi kalo memang belom dapat yang begawenyo dapat gaaji besak tentunyo dak secepat itu. Kalo nak nungguke sampe dapat gaji besak dan sesuai pengalaman gawe aku, bini dan anak aku nak makan apo. Rencanonyo nak kulajuke jugo gawe-gawe kasar atau nganter-ngater koran yang penting dapat gaji dan punyo penghasilan disini.

Kadang dak enak jugo kalo aku dak begawe dan tegantung samo bini. Malu lah aku nich.Jadi nak kulajuke baelah..Mak ini aku masih begoyor fitnes di rumah yo pecak push up tiap hari selamo duo duluh kali, tapi lutut sebagai pijakannyo. Ya yang penting ado usaha nak buat badan aku pecak ade rai.

Tolong do'anya bae supayo aku biso dapat gawean cepat yo mang, friends, apo baelah yang penteng begawe dan ado uwang masok. Yo dak???

Sorry nian aku nak keluar dulu dari sini, dingin niaan disini, jadi nak maked selimut dulu lah, biar ado raso hangat.

See you soon.